ഫുട്ബോള്‍ പോലെ വേറെ എന്തുണ്ട്‌ ഭൂമിയില്‍ ?

Shahabaz Aman
Jun 30, 2020
1 min read

Updated: Jul 5, 2020

ഫുട്ബോള്‍ പോലെ വിശാലമായ ഏതു മതമുണ്ട് ഭൂമിയില്‍ ?

ട്രമ്പിനെ വെറുത്തും ഡെംസിയെ കൊള്ളാവുന്നത്‌?ഹിറ്റ്ലറെ തട്ടി മുള്ളറെ എടുക്കാവുന്നത്‌?

ബ്രിട്ടനെ തള്ളി ബെക്കാമിനെ സ്വീകരിക്കാവുന്നത്‌ ?

ഇന്ത്യയില്ലെങ്കില്‍ ആവട്ടെ ക്രൊയേഷ്യ‌ എന്ന് വെക്കാവുന്നത് ?തോറ്റാലെന്ത്,പോരുതിയല്ലേ എന്ന് മടങ്ങാവുന്നത്?

കളിയാവുമ്പോള്‍ തട്ടിയും മുട്ടിയുമിരിക്കും എന്നാശ്വസിക്കാവുന്നത് ?

സഡന്‍ ഡെത്തിലും ജീവന്‍ തിരിച്ചു കിട്ടുന്നത് ?

കയ്യൂക്കില്‍ കാര്യമില്ലാത്തത്?

പിന്നിലേക്കും കുതിക്കാവുന്നത്?

കാല്‍പ്പന്തു പോലെ മറ്റേതൊരു വിശുദ്ധ ഗ്രന്ഥമുണ്ട് ഭൂമിയില്‍ ?

ഉള്ളു പൊള്ളയായിട്ടുതന്നെയിരിക്കേണ്ടത്‌‌‌ ?

ആർക്കും തട്ടിക്കളിക്കാവുന്നത്‌?

വീണിടത്ത് തന്നെ കിടന്നുരുളാത്തത്‌?ഒരുകൂട്ടർക്കു മാത്രമായി

കൈവശം വെക്കാനരുതാത്തത് ?

എതിരാളിക്ക്‌ എപ്പൊ വേണമെങ്കിലും എടുക്കാവുന്നത് ?

സകലരും ഉറ്റു നോക്കുന്നത് ?

ഡ്രിബ്ലിംഗ്‌ പോലെ സുന്ദരമായ ഏതു ഭാഷയുണ്ട്‌ ഭൂമിയില്‍ ?

ഓരോ കുനുപ്പും കവിതയാകുന്നത് ?

ക്ലാസ്സിക് പദവി പണ്ടേയുള്ളത്‌ ?

ഭാവന വറ്റാത്തത്?

അത്രമേല്‍ മൗനം മുഴങ്ങുന്നത് ?

അത്രക്കും കടലിരമ്പുന്നത് ?

മണിച്ച് മണിച്ച് എടുക്കാവുന്നത് ?

ഫുട്ബോൾ പോലെ ഏതു കഥ,നോവൽ,സിനിമ?

ഓരോ ഇഞ്ചിലും ഇങ്ങനെ ജിഞ്ജാസ മുറ്റുന്നത്‌? എത്രമേൽ ലളിതമാമത്രമേൽ ഗഹനമായത്‌?

ഫുട്ബോൾ പോലെയേതു വിശ്വാസം?

മുൻ ദൈവം എന്നൊന്നുള്ളത്‌?

ചെകുത്താനടക്കം റിട്ടയർമെന്റുള്ളത്‌?

യുക്തിക്കോ അയുക്തിക്കോ വഴങ്ങാത്തത്‌?

പണ്ടേ ഉള്ളതായിട്ടും പഴഞ്ചനാവാത്തത്‌‌ ‌?

പൗരോഹിത്യമേ ഇല്ലാത്തത്‌?

ഫുട്ബോള്‍ പോലെ ഏതു യോഗമുണ്ട് ഭൂമിയില്‍ ?

അധ്യക്ഷന്‍ ഒളിഞ്ഞിരിക്കുന്നത് ?

ഒരൊറ്റ വിസിലില്‍ ഓടിക്കൂടുന്നത് ?

നിയമം ലളിതമായത് ?

ഓരോരുത്തര്‍ക്കും ഇടപെടാവുന്നത് ?

സമാസമത്തിലും പിരിയാവുന്നത് ?

ഫുട്ബോൾ ഗാലറി പോലെ ഏത്‌ പൊതുസ്ഥലമുണ്ട്‌ വേറെ‌‌? ‌

കറുത്തവരെന്നോ വെളുത്തവരെന്നോ ഇല്ലാത്തത്‌?

ആണെന്നോ പെണ്ണെന്നോ നോക്കാത്തത്‌?

എല്ലാവരുടേയും ആഘോഷത്തെ ഉൾക്കൊള്ളുന്നത്‌‌?

എല്ലാ വികാരങ്ങളും പ്രത്യക്ഷമാകുന്നത്‌?